KHAWTHLIR
Special session
Governor Dr Hari Babu Kambhampati chuan Mizoram Legislative Assembly golden jubilee pualin Legislative Assembly pariatna special session neih turin a ko a, a hun chu May 10, 2022 a ni ang.
Lamp Lighting
Blessino Nursing School chuan April 27, Nilaini khan Taxation Hall-ah 3rd Capping and Lamp Lighting Ceremony an hmang a, Health and Family Welfare Board vice chairman Dr ZR Thiamsanga, MLA-in a hmanpui. Dr ZR Thiamsanga chuan, zirlaite chu tumruhna nen, beidawng loa theihtawp chhuaha zir tur leh an thiamnate ram leh mi dangte tan hmang zel turin a chah. Blessino Nursing School hi kum 2019-ah din a ni a, kum khatah zirlai 30 an la ṭhin a ni.
Election training
Siaha DC Lalsangliana, district election officer kaihhruaiin nimin khan MADC-a MDC inthlanpui atana presiding officer 118 leh first polling officer 109-te tan training buatsaih a ni a, mithiamte'n an mawhphurhna leh hriat tur pawimawhte an hrilhfiah.
Lehkhabu tlangzarh
Law & Judicial minister TJ Lalnuntluanga chuan nimin khan Aizawl West College auditorium-ah Aizawl West College-a Education department-in Mizorama zirna kaihhnawih thil an zirchianna, 'Issues Concerning Education in Mizoram' tih lehkhabu a tlangzarh.
Thisen pe
UPC (North East India) hnuaia ṭhalai pawl, PYD Chhipphir Bial chuan nimin khan Kanghmun South community hall-ah thisen pek an huaihawt a, Lunglei Civil Hospital tan thisen unit 69 an pe a, petute mipa 50 leh hmeichhia 19 an ni.
ATC-ah seminar
April 27, Nilaini aṭang khan Aizawl Theological College (ATC) chuan International Missionary Council (IMC) seminar an thleng a, ni thum awh niin, vawiinah zawh a ni ang. Seminar hi IMC Regional Centre Committee, ATC-in an thleng a, India ram leh ram dang pali aṭangin mithiamte an tel a ni.
Sikul enfiah
Lunglei District Committee for Implementation of Covid-19 Appropriate Behaviour chuan nimin khan Lungleia Mt. Hermon Middle School leh Southern Flower Middle School an endik a, Covid-19 chungchanga inkaihhruaina an zâwm ṭha tlangpuiah an ngai.
Saitual Police-in Ganja man
Saitual Police Station team chuan nimin khan Saitual khaw bulah ganja kg. 10 an man a, a neitua puh Zosanga (56) s/o Khana (L), NE Khawdungsei, Saitual district nia insawi an man bawk. Ganja an man hi international market-a Rs 7,00,000 hû a ni.
PCI Assembly
Presbyterian Church of India (PCI) General Assembly vawi 44-na chu nimin khan Umroi, Meghalaya-ah ṭan a ni a, May 1, 2022-ah a ṭiak ang. PCI general Assembly hi Ri Bhoi Synod-in an thleng a, inkhawmpui thupui chu 'Be faithful' tih a ni a; Mizoram Synod aṭangin moderator Rev. Dr Vanlalnghaka Ralte hoin palai 150 an kal a ni.