Indo-Bangla Border Trade-ah Tih tak taka hma la turin chah

Lunglei District Congress Committee (LDCC) chuan thuchhuah siamin, Indo-Bangla Border Trade chu chief minister Zoramthanga kaihhruai sorkarin hmai phih fai nan ringawt hman tum lo a, tih tak takna nena hma la tura an duh thu an tarlang.

LDCC chuan, Congress sorkarin Indo Bangla Border Trade atan nasa takin hma a lak tawh thu leh MNF sorkarin a chhunzawm chuan rah ṭha chhuah ngei se an duh thu sawiin, “Congress kaihhruai sorkarin kum 2016 khan Union minister Rijiju chah chhuakin, parliamentary secreyary (Trade & Commerce) Pu Joseph Lalhimpuia leh sorkar mi pawimawhte’n a hmunah an en tawh a, Pu S Laldingliana (L) pawhin Bangladesh minister-te nen a hmunah an en dun tawh a ni,” an ti a; a hnuah pawh bawhzui zel a nih thu an sawi.

LDCC chuan, “Pu Zoramthanga kaihhruai MNF sorkar hian hmai phih fai nan ringawt hman tum lo tur leh tih tak takna nen hma la se tih hi kan duh tak zet a, kawng thui tak kan sah kuak tawh sa hi nuamsa taka zawh zel turin kan chah a ni,” an ti a; Mizoram leilung hausakna atana ṭha lo tur thawn chhuak zawnga ngaihtuahna séng lo turin an chah bawk.