Minister-in MFTSA inkhawmpui a hmanpui

Mizoram Fisheries Technical Service Association (MFTSA) chuan nimin khan Fisheries conference hall-ah General Conference vawi 29-na an hmang a, Fisheries minister K Lalrinliana’n a hmanpui. Conference thupui chu ‘Lui dung nungcha humhalh leh hman ṭangkai’ tih a ni.

K Lalrinliana chuan, luia nungcha humhalh chuan sangha bakah, chengkawl, kaikuang leh thil dang humhalh a huam thu a sawi a, “A kum tèlin tualṭo thei leh lui dung nungchate an tlem tial tial a, humhalh kawngah mipui leh sorkarte’n theihtawp chhuah a ngai,” a ti.

Minister chuan, “Khawvelin hun harsa tak a tawh chhoh mek lai hian ei tur kan tlâkchham lohna turin sangha dilah mai ni lo, kan ram lui dunga nungchate aṭanga ei tur tam zawk thar kawngah ṭan lak leh zual a ṭul,” a ti a; lui dung humhalhin chhungkaw tam tak eizawnna ngêlnghet tak a siam thu a sawi.

Fisheries department tarlan danin, luia nungcha humhalh leh hman ṭangkai kawngah department-in Lengpuia Fish Seed Farm-ah Nghahrah leh Nghasente a khawi chhin a, dilah pawh an ṭhang ṭha hle tih finfiah a ni. Dapchhuah Branch YMA nen ṭang dunin sangha no khawi pun a, Nghaphusen, Nghabual, Nghahrah leh luia sangha dangte tuitir tum mek a ni bawk.

MFTSA hian an inkhawmpuiah hian Mizoram Journalist Association (MJA) kaihhruaiin kum 2022-2024 chhunga office bearer turte an thlang a ni.