Hripui vei hmuh leh positivity rate a tlahniam

April 27, Nilaini khan Mizoramah Covid-19 vei mi 85 hmuh chhuah a ni a, positivity rate tlahniamin, ni ruk chhunga a hniam ber ṭum a ni. Nimin khan hripui vei dam tawh mi 85 chhuahtir an ni a, hripui vanga thi an awm lo.

Nilainia hripui vei hmuh chhuahte chu mipa 41 leh hmeichhia 44 an ni a; RAT hmanga hmuh 83 leh FIA hmanga hmuh pahnih niin, positivity rate chu 7.49% a ni. RT-PCR leh TrueNAT hmangin swab sample endik ni mah se, positive an awm lo.

April 27-a Covid-19 positive hmuh mi 85 zingah district khawpuia mi 18 chiah an tel a, a bak zawng chu district khawpui páwn lama mite an ni a; hmuh chhuah tamna ber Khawlailungah mi 18 hmuh chhuah a ni.

IDSP record angin, Mizoramah Covid-19 vei 2,27,237 hmuh chhuah a ni tawh a, mipa 1,05,821 leh hmeichhia 1,21,416 an ni a, mipa aiin hmeichhia 15,595-in an tam zawk. Nimin tlai dar 5 thleng khan mi 2,25,896 (99.41%) chhuahtir an ni tawh a, mi 696 (0.31%) thi tawhin, enkawl mek mi 645 (0.28%) an awm.

Nimin tlai dar 5 dinhmun angin, Siaha, Lawngtlai, Champhai leh Kolasib district-ah hripui vei enkawl lai mi 10 an awm tling tawh lo vek a; Serchhip, Mamit leh Saitual district-ah 100 aia tam an la awm thung.

Kum 2011 chhiarpui aṭanga chhûtin, Mizorama Covid-19 vei hmuh tawh 2,27,237 chu mi 1,000 zelah hripui vei mi 206 an awm ang a ni a; mi 1,00,000 zela Covid-19 vangin mi 63 an thi tawh ang a ni tih sorkar thuchhuakin a tarlang.