SSA-a thawkte'n thla 5 hlawh la tawh lo ; SSA-a thawkte'n thla 5 hlawh la tawh lo SSA sum hmuh tawhah hlawh atana Pek chhuah loh a awm lo - Himpuia

School Education enkawltu parliamentary secretary Joseph Lalhim­puia chuan, Mizoram SSA Mission hnuaia thawkte hlawh tur sum pek chhuah duh loh a awm loh thu leh, sum awm ang angte chu hlawh atan pek chhuah zel a nih thu a sawi a, "SSA-a thawkte hi July 2016 thleng hlawh pek tawh a ni," a ti.

Joseph Lalhimpuia hian nimin khan a pisaah thuthar thehdarhtute a kâwm a; sorkar kum kal mek 2016-17 chhung atan sorkar laipuiin Mizoram SSA tan cheng nuai 19625.21 a pawm tih sawiin, "December 31, 2016 thleng khan nuai 4318.83 kan hmu tawh a, chu chu sum hmuh tur zat aṭangin 24.88% chiah a la ni," a ti a; sum hmuh tawh nuai 4318.83 chu Central aṭanga hmuh leh Mizoram sorkar (state matching share) a nih thu a sawi.

Joseph Lalhimpuia sawi danin, Mizoram SSA hian kum 2016-17 atan May 4, 2016-ah Central aṭangin cheng nuai 2265 a hmu a, chu chu July 4, 2016-ah SSA account-ah thun a ni. Central sum pek nuai 2265 do let nan Mizoram sorkar aṭangin August 5 leh 19-ah nuai 612.52 an hmu a, chu chu SSA account-ah August 30 leh September 23-ah dah luh a ni.

September 29-ah Central aṭangin nuai 1441.31 an hmu leh a, chu chu November 22-ah SSA account-ah thun a ni a, a tuk November 23-ah district tinah nuai 847.20 sem nghal a ni. Kum 2015-16 sum hman loh nuai 563.92 nen December 2016 thlenga Mizoram SSA sum hmuh tawh zat chu nuai 4882.75 a ni a; tuna hman loha la awm chu nuai 658.98 a ni.