District hmasawnna tur sawiho

Serchhip DC Dr Lalrozama hoin nimin khan DC conference hall-ah Serchhip khawpuia sorkar officer te, tlawm-ngai pawl hruaitu te, khawtlang hruaitute leh chanchinbumite telna Coordination Committee an ṭhukhawm a; Serchhip district hmasawn dan tur an sawiho.

Dr Lalrozama chuan, "Sorkar hnathawh dan leh tuna dinhmun hrang hrangte mipui hruaitute'n min hriatpuiin, harsatna awm thei leh hmabak la awmte min hriatpui se ṭha kan ti a. Chutih rualin, engkim inhriatpui tawna thawhhona ṭha lehzual neih dan kan zawn zel a pawimawh a ni," a ti.

Mipuite'n sorkar hmalakna atana an duh chi hrang hrangte inhrilh­hriat fo a pawimawh tih sawiin Serchhip DC chuan, khawtlang hruaitute, tlawmngai pawl hruaitute leh chanchibumite chu ṭha leh ṭul nia an hriat­te huai taka sawi chhuak a, district changkang leh hmasawn tak an nih theihna tura an rawtnate sawi ṭhin turin a ngen.

Meeting-ah hian department officer hrang hrangte'n an an hnathawh tawh chin leh hmabak la awm te, harsatna awm thei te, ruahmanna kal mekte leh khawtlang hruai­tute nena thawhho a ṭulna chi hrang hrangte an tarlang a ni.