Kum 2019-ah thisen unit 30,232 pek a ni AVBD-in thisen pete chungah lawmthu sawi

Kum 2019 chhung khan Mizoram pumah thisen unit 30,232 pek a ni a, chu'ng zinga unit 27,049 chu pek bik nei loa a thlâwna pek (voluntary donation) niin, thisen pek zawng zawng aṭangin 89.49% a tling. Association for Voluntary Blood Donation (AVBD) chuan thuchhuah siamin, kum 2019 chhunga thisen petute zawng zawng chungah an lawm thu an tarlang.

AVBD thuchhuah chuan Mizorama blood bank 11-a thisen pekte khaikhawmtu Mizoram State AIDS Control Society (MSACS)-in record an tarlang a; an tarlan danin, January-December 2019 chhung khan blood bank 11-te'n blood donation camp vawi 507 an nei a, donation camp aṭang chuan thisen unit 20,270 hmuh a ni. Blood bank 11 zinga voluntary donation ṭhatna ber chu Aizawl Civil Hospital (ACH) a ni a, thisen an dawn unit 15,694 zinga unit 14,613 chu voluntary donation niin, 93.11% a tling. Voluntary donation hi district hospital pathumah 90% chung lam a ni a; chu'ngte chu - Champhaiah 92.73%, Siaha-ah 92.15% leh Serchhipah 90.88% a ni. Hetih lai hian, voluntary donation hniamna ber Lawngtlai District Hospital-ah chuan 69.56% a ni thung.

AVBD chuan kum 2019-20 (financial year) chhung atana voluntary donation target an siam chu 90% a ni tih sawiin, "Target hi tun dinhmunah blood bank palite'n an tlin theih laiin, la tlin ve thei lo pasarih an awm. Kum 2019-20 financial year-ah thla thum a la awm a, hemi chhung hian blood bank dangte pawhin 90% an tlin vek theih nan Mizo mipuite thisen pek kawngah ṭan la zel turin kan ngen a ni," an ti.

Private hospital-a damlo awmte'n sorkar blood bank aṭanga thisen an lak dana Mizoram sorkarin tun hnaia ruahmanna thar a siam chungchangah AVBD chuan, uluk leh fimkhur taka an thlir reng thu sawiin, "Thu léngvâk tam tak karah mipuite chiâi mai lo tur leh thisen pek kawngah hnual phah nan hmang lo a, ṭhahnemngai taka thisen pe zel turin kan ngen a ni," an ti a; Mizo ṭhalaite ṭang mar zel turin an sáwm.

AVBD chuan, thisen mamawhtu damlote'n a hun taka thisen an dawn chu an duh ber leh an hmalakna ber a nih thu sawiin, "Blood bank aṭanga thisen lak chhuah chungchangah a ṭul angin Health department hotute dàwr zel tum a ni. Thisen pek chungchang hi thih leh dam kar thil a nih avangin damlote mamawhna hriain sorkar pawhin mipui ṭhatna tur a ngaihtuah zel kan beisei a, thisen mamawhtu damlote tana remchang leh ṭha ber turin thil a kal zel kan beisei tlat a ni," an ti.

AVBD thuchhuah chuan, thisen petute zawng zawng chunga lawmthu an sawi rualin, kum 2020-ah pawh ṭhahnemngai leh zuala ṭan la a, uar zawka thisen pe zel turin Mizo mipui, a bik takin ṭhalaite an sàwm thu a tarlang a ni.