Ṭhál chhungin kum hmasa aiin kuminah Tlawng luiah tui a tam

Aizawl khawpui tuia châwmtu Tlawng luiah kumin ṭhál chhungin nikum ṭhál lai aiin tui a tam. Hetih lai hian, Tlawng luiah Aizawl khawpui bawlhhlawh luang lut a tam avangin ruahsûr nasat laiin Greater Aizawl Water Supply Scheme (GAWSS) Phase-I hmangin tui pump mumal theih a ni lo ṭhin.

Public Health Engineering (PHE) department hotute chuan Vanglaini palai zawhna chhángin, kum 2021 ṭhál lai aiin kumin ṭhálah Tlawng luiah tui a tam zawk thu an sawi a, "Tui pump turah harsatna a la awm lo," an ti.

Tlawng luiah hian kum 2019 khan tui a tlem lai berin million litre per day (MLD) 70.742 a awm a, kum 2020-ah MLD 65.97, kum 2021-ah MLD 31.461 a awm. Kuminah erawh chuan chawh rualin MLD 80-90 vel a awm thung.

Kum 2021 ṭhál laiin Tlawng luiah tui a tlêm avanga harsatna thleng chu a thlen nawn tawh loh nan hma an lak thu PHE hotute chuan an sawi a, "Ṭhál lai daih turin Tlawng lui hnár lamah tuikhuah lailâwk kan siam tawh a, hei hian ṭum danga tui kan pump zawh theih bak tui luang tlang ṭhin tur ang kha eng emaw zat a lo khuap lâwk a, ruah a sûr zeuh bawk nen, Tlawng luiah Aizawl mamawh khawp tui a awm thei rih," an ti.

GAWSS Phase-I hmanga tui pump chhuahna hi Serluiin Tlawng lui a finna thlangah a awm a; Phase-II chu Serluiin Tlawng lui a finna chhak lamah a awm thung. Tuikhuah lailâwk an siamna chu GAWSS Phase-II hmanga tui pump-na chhak lam km. 2 vela hláah a ni.

PHE department hotute chuan, Tlawng lui chu Aizawl khawpui tui tlan ber a nih avangin Tlawng lui bakah, a fintu lui tête humhalha tihbawlhhlawh loh a pawimawh thu an sawi a, "Tun hnaia ruah rawn súrah khan tui a tam khawp mai a, mahse, Aizawl khawpui sira luang tlang Vailui-Serlui aṭanga bawlhhlawh luangin Tlawng lui a fin hnuah GAWSS Phase-I hmangin tui pump tur thianghlim a awm meuh lo," an ti.

PHE hotute chuan, "Mipui tui tlan tur a nih avangin quantity aiin quality ngaih pawimawh a ngai a, kan pump theih zat aia tlemin tui pump a ngaih phah," an ti a; lui dung leh a chhehvelah leivûng leh bawlhhlawh paih tawh lo turin mipui an ngen nghal a ni.