Kut hnathawkte hmasawnna kan ngai pawimawh ber - Lalduhoma

ZPM leader Lalduh­oma chuan, hnam zah­awm ni turin ei leh bara intodelh a pawimawh thu sawiin, ZPM chuan kut hnathawkte hmasawnna an ngaih pawimawh ber thu a sawi.

Lalduhoma hian nimin chhun lam khan Siaha district-a Laki, Theiri, Ahmypi leh khaw dangte tlawhin thu a sawi a, "Mizoram mipui 60% vel hi Agriculture & allied sector-a innghat kan ni a, ZPM chuan kut hna­thawktute hmasawnna hi ngaih pawimawh ber (top priority)-ah a nei dawn," a ti.

ZPM Leader chuan, "Hnam zahawm kan nih theihna turin ei leh bàra kan intodelh ngei theih nan hma kan la dawn a ni. Tuna kan sorkar lai budget siam kan en chuan, kut hnathawktute tan engtih tham mah a awm lo," a ti a, Mizoram sorkarin kut hnathawktute a ngai pawimawh tâwk lo hle tih a lan thu a sawi.

MADC huam chhung­ah kut hnathawktute tana hmunhma ṭha tak tak a awm tih sawiin Lalduhoma chuan, "Heng hmunhma hman ṭangkai loha awmte hi ZPM kan sorkar chuan Zoram ei bél tling thei khawpa cheibâwl kan tum dawn a ni. Zoram ei bél ni tura theihna tam tak awm hi mipui sorkar hmanga hâi chhuak turin ṭanrualpuiah ka sawm che u a, tun inthlan aṭang hian bul i ṭan ang u," a ti.