Minister-in infiamna hmunhma a tlawh

Sports & Youth Services (SYS) minister Robert Romawia Royte chuan nimin khan Lungleia infiamna kaihhnawiha hna thawh hrang hrang a tlawh a; Lunglawna Community Service Centre cheng nuai 140 sénga sak tur lungphùm a phúm.

SYS Minister hian Zobawka Residential Sports School sak mek a tlawh a; Sports School hi cheng nuai 4,100 sénga sak tur niin, hna thawh tur 60% vel an thawk zo tawh.

Theiriata khelmual laih zawm ngai pawh a tlawh nghal a, cheng nuai 30 pek belh a nih tur thu leh Lunglei Rahsi Venga District Sports Complex sak tur chu May 2022-ah hna ṭan theih beisei a nih thu a sawi.

Robert Romawia Royte hian nimin vek khan Lungleia Ṭhuamluaia Muala phûl lem hlui thlâka phûl lem thar phahna tur lungphûm a phúm a, HPC Cup 2022 khàrna inkhawm a hmanpui nghal.

SYS Minister chuan, Sports minister hmasa Zodintluanga Ralte-in Mizorama phûl lem phah pahnihna ni tura Ṭhuamluaia muala phûl lem a lo phah chu a hlut thu sawiin, "A rim em avang leh kum 10 chuang a nih tawh avangin thlâk a ngai tawh a ni," a ti.

Robert Romawia chuan, cheng nuai 500 séngin technology thar hmangin drain board system siam a nih tur thu te, Lungleia Aquatic Centre leh tui hleuhna swimming pool siam nan cheng nuai 700 ruahman a nih thu te, Mizorama futsal ground ṭha ber tur Pukpuiah leh Ramthar Vengah din a nih dawn thu te, Rahsi Vengah phûl lem phah a nih dawn bakah sports complex siam tum a nih thute a sawi bawk.