Congress party chu a thutiamah a ding nghet ṭhin - Zodintluanga

Congress Legislature Party (CLP) leader leh MPCC treasurer Zodintluanga Ralte chuan April 28, Ningani zan khan Siaha South II-a INC candidate KH Beihlo campaign office a hawng a, thu sawiin, Congress party chu a thutiam a ding nghet ṭhin party a nih thu a sawi.

Zodintluanga Ralte chuan, Congress party chu a thutiamah a ding nghet ṭhin tih sawiin, "Mara ram hmasawnna leh mi rethei thleng phâk policy pawh a taka kalpui ṭhin chu Congress party hi a ni. MNF chu SEDP cheng nuai thum sem an tiam avangin an sorkar a, SEDP an kalpui mek dan erawh mipui chàn loh khànah a lo chhuak thung," a ti.

SEDP hnuaia vaimin chi sem dan chu thil mak a nih thu sawiin Zodintluanga chuan, "Thlawhhma la miah lo mi eng emaw zat hnenah vaimim chi an sem a, chhungkaw tam takin hmalak ngaihna an hre lo. Ran chaw atan hman dawnin damdawi nena sâwngbàwl a ni bawk si, mihring ei tlakah an ngai bawk si lo," a ti a, vaimim chi dawng tam tak chuan tih ngaihna hre loa an chawh let an chawh let thu a sawi.

CLP Leader chuan, vaimim chi sem zawhah telhâwng, kaikuang leh chengkawlte an kalpui leh dawn nia a lan thu a sawi a, "Cheng nuai thum sem tura intiamte chêt hmang aṭang hian MNF party rintlak lohzia a lang chiang hle a ni," a ti.

Zodintluanga Ralte chuan, Congress party chu an insiamṭha chho a, an president thar Lalsawta hoin an tho kâng leh mek niin a sawi a; MADC inthlanah Congress party candidate-te vote turin mipui a sáwm a ni.