Ramhnuai aṭanga chhuak, party danga kal zingah hlawhtling an awm lo - MNF Treasurer

MNF treasurer K Vanlal­auva chuan, ram­hnuai aṭanga chhuak, party danga kal tate zingah leader hlawhtling zui an awm loh thu leh, an hlawhtlin zui loh chhan chu hnam movement an phatsan vang a nih thu a sawi.

Nimina Mizo Hnam Rûna inkhawmah thu sawiin K Vanlalauva chuan, MNF chu Mizoram political party zinga no hringtu nu ber a nih thu leh tuna party dang hruaitu lute chu MNF-a awm tawh vek an nih thu a sawi a, "Ramhnuai aṭanga chhuak, party danga lutte zingah leader nia hlawhtling zui ta an awm miah lo. A chhan chu hnam movement an phatsan vang a ni. Leader ṭha ni tur chuan kal kâwi kal kâwi lo nih a ngai," a ti.

MNF treasurer K Vanlalauva chuan, "MNF hi Mizoram political party-ah chuan a pui ber leh no hringtu ber a ni," a ti a; Congress president hlui Lal Thanhawla chu kum 1966-ah MNF-ah a tel ve tawh thu te, tuna Congress president Lalsawta chu kum 1993 khan MNF ticket-in Aizawl South-II bialah MLA atan thlan tlin a nih tawh thu te, ZPM leader Lalduhoma chu MNF general secretary a nih tawh thu te, BJP president Valalhmuaka pawh MNF joint secretary a nih tawh thute a sawi.

Party dang chungchang sawiin K Vanlalauva chuan, "ZPM hi movement an nih lai chuan duh duh sawi a rem, unit leh block neih ṭul ti lo, Chakma rama unit neih ṭul ti lo an ni a, party an nih hnuah chuan an thusawi ṭhinte sawi a rem ta lo. BJP North East enkawltuin nakkum Mizoram inthlanah BJP kan sorkar dawn a ti a, âwih a harsa. Central-a Congress-in hruaitu an dap mek a, páwn lam mite'n hruaitu tur an dappui a ngai hial tawh a ni," a ti.

MNF Treasurer chuan, MNF president Zoramthanga chu Laldenga hnena training la a nih thu te, Mizo hnam movement chi hrang hrang inzir thiama pass a nih thu leh hnam movement zirtirna petu ber a nih thu a sawi bawk.