Rorel laiin 2023 MLA inthlanpui an nghâkhlel lo ber - K Sapdanga

ZPM working president K Sapdanga chuan, kum 2023 MLA inthlanpui nghâkhlel lo ber chu tuna rorel lai party MNF an nih thu leh ZPM chu party dangin an huphurh rawn ber leh beih rawn ber a nih thu a sawi.

K Sapdanga hian April 28, Ningani khan Siaha South-I biala ZPM campaign hawnnaah thu sawiin, "Nakkuma MLA election lo thleng tur hi a nghâkhlel lo ber chu rorel lai party an ni a, nghâkhlel ber chu neutral-te an ni. Ṭhalaite'n rorelnaah kalphung thar an duh tawh a, kan ram kal tawh dan an thlirin an lung a awi tawh lo," a ti.

Party dang zawng zawngin an beih rawn leh an huphurh rawn chu ZPM a nia sawiin Sapdanga chuan, "An beih rawn luih luih reng mai a ni. Kan unaute hian sorkar thar siam turin min nawr lut dawn ni berin kan ngai," a ti. Party dangte an haw lo tih sawiin, "Khawtlang leh kohhrana kan rawngbawlpuite an ni. Amaherawhchu, engkim tan Pathian hun ruat a awm a, tlak hun a awm a, tlin hun a awm. Mipui rilru sûkthlek thlir hian rorelna hi ZPM party kutah an dah tawh hialin a hriat a ni," a ti bawk.

ZPM Working President chuan, May 5, 2022-a MADC inthlanpui awm turah ZPM candidate-te an dinna bialah vote ṭheuh turin mipui a sáwm a ni.

ZPM hruaitu Vanlalhlana, MLA pawhin thu sawiin, "Eng pawh tâwk i la, result ṭha emaw, result lawmawm lo emaw pawh nei ila, lawm takin kan pawm tur a ni," a ti a; Pathianah innghat tlat turin MDC candidate-te leh mipui a chah.