Neutral tana vote nawn chhan tlak MNF sorkarin hnathawh an nei - Ruatkima

MNF adviser Lalruatkima, minister of state chuan, party-a awmna nei lo neutral-te tan MNF sorkarin vote nawn chhan tlak tur hnathawh an neih thu a sawi.

Lalruatkima hian nimin khan Amobyu Vaithei, Zyhno, N Laty leh Saikao khuate a tlawhnaah thu sawiin, MADC inthlan turah MNF party mipui phûrzia a hmuhin lawmawm a tih thu leh beiseina sang tak a neih thu a sawi a, "Neutral tan MNF sorkar hi vote nawn chhan tlak a nihna tam tak hnathawh a nei a ni," a ti.

MNF Adviser chuan, Congress sorkar hnuaiah zu zawrh a nih avangin hmeithai leh fahrah an pung nasa nia sawiin, "Sum harsatna phuhrûk turin zu chhiah an ît a ni. MNF erawh chuan zu chhiah avanga hausak ai chuan zu chhiah tel loa retheih kan thlang a, mi tam tak suattu zu zawrh ṭha kan ti lo a, kan titawp nghal a ni," a ti a; MNF sorkarah kawngpui a ṭha ta hle niin a sawi.

Lalruatkima chuan, Congress sorkarah zirlaite'n Assam lakah chhantu an nei lo nia sawiin, "Tunah chuan a ṭul dang ang anga ramri humhalh ngam sorkar a ding ta a, ram neitute kan sorkar tâkah chuan ramri humhalh kawngah awmze neiin huaisen takin kan kal mek a ni," a ti a; Mizorama sorkar mek MNF chu Mara mipui tana malsawmna thlen theitu dik tak a nih thu a sawi bawk.