RD Minister-in Lawngtlai a tlawh

Rural Development (RD) minister Lalruatkima chuan April 28, Ningani khan Lawngtlai a tlawh a; District Rural Development Agency (DRDA) leh Block Development Office (BDO)-a thawktute nen an inkawmnaah harsatna leh mamawh an neihte leh hmasawnna turte an sawiho.

Lalruatkima chuan, sorkar hnathawkte chu Conduct Rules-in a phuar tih hria a, social media-ah thu dik tâwk lo hmanga sorkar sawichhiatna laka inthiar fihlim tur leh sorkar hmalakna a hlawhtlin theih nan theihtawp chhuah turin a chah.

RD department hnuaia thawktute'n ṭanrualna, inpekna, thawhhona leh inpumkhatna ṭha an neih thu sawiin Minister chuan, "Covid-19 léng vanga ram mipuiin harsatna an tawh mek laiin RD department hnuaiah mipui khawsak tihawlsam nan ni 100 inhlawhna kalpui a ni a, MzSRLM hnuaiah self help group kaltlanga eizawnna ṭhahnem tak siam a nite hi thingtlanga mi harsa zawkte tan malsawmna a ni," a ti.

State ṭhenkhatin MGNREGA hnuaiah ni 25 chauhte inhlawhna an la kalpui thu sawiin Lalruatkima chuan, "Mizoram chuan ni 100 inhlawhna kan pe thei a, kumin atan ni 90 inhlawhna tur chauh hmuh a ni chungin a dang dil belh theih a nih thu sorkar laipui aṭangin dawn a ni," a ti bawk.