A thlàwna semin hmasawnna a thlen lo - ZPM Ṭhalai President

ZPM Ṭhalai president Malsawmzuala Ralte chuan MADC inthlanpui inbuatsaihna kal mekah April 28, 2022 khan Thosai khuaa ZPM campaign office a hawnnaah thu sawiin, a thlàwna sum sem leh thawh hahna tel loa sum inpekin hmasawnna a thlen loh thu a sawi.

Malsawmzuala Ralte chuan, thawhrimna hmanga hmasawnna a tlo ber tih sawiin, "Thawhrimna hmanga hmasawnna hi kan ngaihlu ber tur a ni. A thlàwna sum sem emaw, thawh hahna tel lo emaw hian hma min sawntir ngai lo," a ti a; tling zo lo tura an ngaih pawh ni se, an duh zawng tak vote mai tur leh ZPM candidate-te vote turin Mara ram mipui a chah.

ZPM-a a tel chhan chu ZPM policy a ṭhat vang a nih thu sawiin Malsawmzuala chuan, "Mipuite'n tun aia hma kan sawn theih beiseiin ZPM-ah ka tel ve a ni," a ti a; dik taka tih chuan politics-ah hausak viauna tur a awm lo tih sawiin, "Ram leh mipui aia mahni hamṭhatna, nawmsakna, sum leh páia inhai vûr duh rorêltute hi kan chunga rorel zui zel tur an ni dawn em ni? Chutiang mi chu mipuite'n kan vote hmanga kan paih a hun tawh a ni," a ti.