KHAWTHLIR

Thisen pe
Institute of Advanced Studies in Education chuan nimin khan Civil Hospital, Aizawl blood bank-ah thisen pek an huaihawt a, thisen unit 59 an pe a, petute mipa 40 leh hmeichhia 19 an ni. Ramhlun Venglai Branch YMA-in an din champha vawi 25-na pualin an vengah thisen pek an huaihawt a, Civil Hospital tan thisen unit 56 an pe a, petute mipa 44 leh hmeichhia 12 an ni. Mizo Higher Secondary School NSS pawhin nimin khan Civil Hospital, Aizawl tan thisen unit 32 an pe bawk.

Geology & Mining-in Nuai 632.11 chhûng
Directorate of Geology & Mining chuan sorkar kum liam ta, 2021-22 chhung khan Mizoram sorkarah chhiah (non-tax revenue) Rs 6,32,11,468 an chhûng lut. Revenue an chhun luhte chu minor mineral aṭangin Rs 5,36,34,087 leh petroleum licence (PEL) fee aṭangin Rs. 95,77,381 a ni. Geology and Mining hi Geology & Mineral Resources tia thlak a nih hnuah February 2, 2022 khan Geology & Mining tiin a hming thlak lêt leh a ni.

Hmanrua hlân
AMC Ward-XVII bialtu councillor David Zohmangaiha chuan nimin khan Republic Veng Health and Wellness Centre hnenah nu nau pâite ṭhat leh ṭhat loh enfiahna tur HB digicheck, fetal doppler leh file rack-te a pe. Councillor chuan, hriselna hi nu pum chhung aṭangin kan ṭan tur a ni a, mi tin hian kan ngaih pawimawh ṭheuh a ṭul hle a ni. State hrisel leh fit ber, veng hrisel leh fit ber kan nih theih nan ṭan i la tlang ang u," a ti.

Hindi zirtirtute Inkhawmpui
Mizoram Hindi Shikshak Sangh chuan nimin khan Vanapa Hall-ah conference an hmang a, School Education director Dr H Lalthlangliana'n a hmanpui. Inkhawmpuiah hian resolution an siam a, 'Mizoram sorkarin Hindi subject ngai pawimawha Hindi teacher a la thar hi lawmawm kan ti a, Mizoram sorkar chungah lawmthu kan sawi. Mizoramah Hindi zirnain hma a sawn zel theih nan Hindi teacher lak a ni leh dawn a nih chuan zirtirtu atan Hindi Training College chhuakte chauh sorkarin la tawh rawh se,' an ti.

Aiting tlangzarh
Khawzawl College-a Mizo department-in Bachelor of Arts Mizo zirlaibua hla awmte zir zauna, 'Aiting' tih lehkhabu an buatsaih chu nimin khan College multipurpose hall-ah district bawrhsap CC Lalchhuangkima'n a tlangzarh.

Aadhaar & ration Card thlun zawm
Kolasib District Civil Supply Officer chuan nimin khan thuchhuah siamin, kumin May thlaah chawlhkar tina Ningani leh Zirtawpni apiangin Aadhaar card leh ration card thlun zawm rûnpui neih a ni dawn tih a tarlang a; Ration Card Software (RCMS)-a Aadhaar card la link ve lote tana a bika ration buhfai pek ṭhin chu May 2022 aṭangin a tàwp tawh dawn tih a tarlang bawk.

Tui lâkna hlân
Assembly deputy speaker Lalrinawma chuan nimin khan a bial Tuikum chhunga Sialhau khua a tlawh a, MLA fund hmanga Sialhau khaw châwmtu tur Tuivamit tui lakna bun fel tawh chu Village WATSAN Committee kutah a hlân.

TT academy hawng
Aizawl West-III bialtu MLA VL Zaithanzama chuan nimin khan Mission Vengthlang Table Tennis Club-in Mission Vengthlang Table Tennis Academy (non residential) an buatsaih a hawng. Academy-ah hian a duh apiang tan kal theih a ni a, kum 18 hnuai lam tan thla khatah Rs 500 leh puitling tan Rs 1,000 chawi a ngai a ni.