April 28-a Covid-19 positivity rate 10%

April 28, Ningani khan Mizoramah Covid-19 vei mi 99 hmuh chhuah a ni a, swab sample endik zat aṭanga positive zat chu 10% a ni. Nimin khan hripui vei dam tawh mi 113 chhuahtir an ni a, hripui vanga thi an awm lo.

Ningania hripui vei hmuh chhuahte chu mipa 42 leh hmeichhia 57 an ni a; ZMC RT-PCR laboratory-a hmuh mi pakhat leh RAT hmanga hmuh 98 an ni.

April 28-a Covid-19 positive hmuh mi 99 zingah district khawpui huam chhunga mi 22 an tel a, a bak 77 chu district khawpui páwn lama mite an ni. Aizawl khawpui chhung bikah mi pali chiah hmuh chhuah a ni.

IDSP record angin, Mizoramah Covid-19 vei 2,27,336 hmuh chhuah a ni tawh a, mipa 1,05,863 leh hmeichhia 1,21,473 an ni a, mipa aiin hmeichhia 15,610-in an tam zawk. Nimin tlai dar 5 thleng khan mi 2,26,009 (99.42%) chhuahtir an ni tawh a, mi 696 (0.31%) thi tawhin, enkawl mek mi 631 (0.27%) an awm.

Nimin tlai dar 5 dinhmun angin, Siaha, Lawngtlai, Champhai leh Kolasib district-ah hripui vei enkawl lai mi 10 an awm tling tawh lo a; Serchhip, Mamit leh Saitual district-ah 100 aia tam an la awm thung.

Kum 2011 chhiarpui aṭanga chhûtin, Mizorama Covid-19 vei hmuh tawh 2,27,336 chu mi 1,000 zelah hripui vei mi 206 an awm ang a ni a; mi 1,00,000 zela Covid-19 vangin mi 63 an thi tawh ang a ni tih sorkar thuchhuakin a tarlang.