Kum 2016-ah ramdang mi 956-in Mizoram an rawn tlawh

CID (Special Branch) hnuaia Foreigner Regis­tration Office chhinchhiah danin, kum 2016 chhung khan Mizoramah ram dang mi (foreigner) 956 an lo zin a, ram hrang hrang 61 aṭanga lo kal an ni.

Ram dang mi lo zin zingah hian American tam berin, mi 216 an lo zin a; a dawttu Britian aṭangin mi 131 an lo zin.

Mizoram rawn tlawh-tute zingah mi 603 chu zin khawthawng an ni a, mi 85 chu chhungkhat leh ṭhiante tlawh tura lo zin an ni. Mi 96 chu sumdawnna thila Mizoram rawn tlawh an ni a, a bak 71 chu hna thawk tura lo kal an ni.

Tun hma chuan ram dang mite tan Mizorama lut turin Ministry of Home Affairs aṭangin Protected Area Permit (PAP) lak a ngai ṭhin a, kum 2011 aṭang khan Home Ministry chuan PAP chu kum khat chhung zel atan a thlahdul ṭhin. Afghanistan, Pa­kistan leh China mite tih loh, ram dang zawng tan chuan PAP lak a ngai tawh lo a ni.

Hetih rual hian, ram dang mi, Mizorama lo lut reng reng chu Mizoram an lo thlen aṭanga darkar 24 chhungin Foreigner Registration Office-a inhriattir tur a ni a; inhriattir lote chu hrem theih an ni.