Rawpuichhip YMA-in Kawng dan an titawp

Rawpuichhip branch YMA-te'n an khaw chhung kawng siam phûta January 9, 2017 aṭanga NH-44(A), Rawipuichhip hêlna kawng an dan leh hna thawktute an chawlhtir chu nizan aṭanga khan an titawp.

Kawng dan a nih chungchangah hian nimin khan Aizawl Addl. DC, Mamit SP, PWD hotute leh Rawpuichhip YMA hruaitute Rawpuichhipah an ṭhukhawm a; Rawpui­chhip khaw chhung kawng siam tura sorkar nawr tura inremna an siam avangin, YMA-te chuan nizan khan kawng dan an titawp a ni.

Rawpuichhip YMA hruaitute hnen aṭanga thu dawn danin, NH-44(A) kawng tur hi survey a nih lai aṭangin kawngpuiin an khua a tlawh lo tur chu an lungawi lo a, sorkar pawh theih tawpin an kar a ni. Kawng thar laih a nih chuan an khaw chhung kawngpuite chei ṭhatsak an tiam avangin an lungawi a ni.

Hemi chungchangah hian sorkar term hmasaah khan an khawtlang hruaitu te, bialtu MLA leh PWD Engi­neer-in-Chief ten MLA pisaah inremsiamna an siam.

Bialtu MLA leh PWD thuneitute tiam angin, an khaw chhung kawngte siam a la nih loh avangin Rawpuichhip YMA chuan lungawi lohna lantir nan leh sorkar kar nan kawng an dan bakah, hnathawh kal lai an tihtawptir a ni.