CSS Hindi zirtirtute tan ṭan kan la : Joseph Lalhimpuia

Parliamentary sec­retary (School Education) Joseph Lalhimpuia chuan, centrally sponsored scheme (CSS) hnuaia Hindi zirtirtute hlawh pek a nih theih nan leh chhawr chhunzawm zel an nih theih nan sorkar laipuiah an nawr mek thu a sawi.

Joseph Lalhimpuia hian January 10, 2017 tlaia a pisaa thuthar thehdarhtute a kawmnaah zawhna chhangin, CSS hnuaia Hindi zirtirtu thawk mekte chu kum nga atan rawih an nih thu leh, kum nga term chu February 2017 thleng a nih thu a sawi a, "February-ah rawih an nih hun a tawp dawn a, an thawh chhunzawm zel theih nan hmalak a ni," a ti.

Parliamentary Secre­tary sawi danin, CSS Hindi teacher-te chu kum nga term an hman mek a tawp hnuah pawh an thawh chhunzawm zel theih nan Mizoram sorkarin hma a la a; chief minister Lal Thanhawla leh School Education minister H Rohluna ten Ministry of Human Resource Development (MHRD) bakah, Prime Minister-ah thawh chhun­zawmtir tura ngenna leh­kha an ziak tawh ṭhin. Prime Minister aṭang chuan tun thlengin chhan­na an la dawng lo a ni.

CSS hnuaia Hindi zirtirtute hi an vaiin 1,305 an ni a, tun dinhmunah thla eng emaw zat chhung hlawh an la tawh lo. An hlawh tur hi sorkar lai­puiin a tum vek a ni a, Mizoram sorkarin tum ve a nei lo. Joseph Lal­him­puia chuan, Hindi zirtirtute hlawh tur chu theihtawpin sorkar laipui­ah an nawr ṭhin thu a sawi.

Parliamentary Sec­retary chuan, CSS Hindi zirtirtute hlawh tur chu a buaithlak ṭhin hle tih sawiin, "Hlawh an la thei lo ṭhin hi kan khawngaih a, kan lainat em em a, hlawh an lak theih nan theihtawp tak meuh kan chhuah a ni," a ti.