Lungleiah Police Sammelan neih a ni

February 5, Nilaini tlai khan Lunglei SP pisa conference hall-ah Lunglei District Police Sammelan hman a ni a; Lunglei DEF, Hnahthial DEF leh 2nd Battalion MAP-te telin, director general of police (DGP) SBK Singh-a'n a hmanpui. Sammelan hi Lunglei SP C Lalthanmawia'n a kaihruai.

Lunglei SP chuan, Lunglei district-a police-te'n harsatna an tawhte leh an mamawhte DGP hnenah a thlen a; police quarters thar an mamawh thu te, an lirtheite a hlui tawh avangin a thara thlak a ngaih tawh thu te, police uniform hrang hrang thar an mamawh thute a sawi.

DGP SBK Singh chuan, Mizoram Police-in hmalakna leh hmasawnna tur tam tak an neih thu sawiin, Chief Minister leh Home Minister-te pawh a sawipui tawh thu a sawi a, "An hmalaknain sorkar laipui Home Ministry-ah cheng vbc. 400 hû DPR thehluh a ni tawh a, kan dilna hi a hlawhtlin chuan harsatna kan tawh mekte sutkian theih ka beisei," a ti.

SBK Singh chuan, district tina SP leh medical superintendent-te hmalaknain police-te hriselna endik a nih tur thu sawiin, "Police zinga ruih theih thil vanga harsatna neite tan March 2020 aṭangin PTS-ah training neihtir a ni ang," a ti. Police-te chu inthununna ngai pawimawh tura chahin, office leh duty-naah thil ṭha tih tum turin a fuih a, Mizoram Police hming tiṭha tura ṭan la ṭheuh turin a chah bawk.