Dan loa kuhva tawlh tawh lo turin CYMA President-in mipui a chah

Central YMA president R Lalngheta chuan, YMA chu kuhva ro chungchangah a dinna ngaiah a la ding reng tih sawiin, CYMA-in tih dan tur a rèl fel hma chuan Myanmar aṭanga kuhva ro tawlh tawh lo turin mipui a chah.

CYMA hruaitute chuan April 30, Inrinni khan Bairabi North-a kuhva rah ro dah khawmna hmun bamboo industry kudam pakhat an tlawh a; Zampuimanga Group YMA hruaitute'n lo dawngsawngin, Bairabi South Branch YMA Office-ah kuhva rah chungchanga hmalak zui zel dan tur an sawiho a ni.

Bairabi Group YMA vice president H Vanlalhruaia kaihhruai inkawmhonaah hian CYMA President chuan, Myanmar aṭanga dan loa kuhva rah tawlh luh leh Mizorama a awm sa lâk chhuah chungchangah CYMA chu a dinna ngaiah a la ding reng tih sawiin, "CYMA-in a tih dan tur a rel fel hma chu Burma kuhva rah ro hi tuma'n a rûkin emaw, kan thiam dan anga lo tawlh lo turin kan inngen nawn leh a ni," a ti.

R Lalngheta chuan, Myanmar aṭanga kuhva rah tawlh chungchang chu CYMA-in zir chiangtu tur study team a din tih sawiin, "CYMA study team hian Mizoram hmun hrang hranga kuhva rah ro dah khawmna kudam an tlawh tawh a, mi chi hrang hrang an kâwm tawh bawk. Study team leh CYMA office bearer-te'n kan sawiho leh ang a, Central Executive Committee (CEC) meeting-ah sawiho a ni leh dawn a, CEC meeting thutlukna angin kalpui a ni dawn," a ti a; Zampuimanga Group YMA-in dan loa kuhva rah tawlh rûk dah khawm tam tham tak an man chu lawmawm an tih thu a sawi.

Vanglaini palai zawhna chhangin R Lalngheta chuan, kudama kuhva rah dah chu ip 600 a tlin ngei an rin thu a sawi a, "Bairabi police-te pawh kan kâwm a, police lam chuan mi kudama mi chu kan man ngawt thei lo an ti a, kan pute'n instruction min pek ang angin kan ti mai an ti. Hemi chungchangah hian sorkar hotute kan dàwr leh ang," a ti.

CYMA President sawi danin, kudama kuhva rah dah khawm zinga eng emaw zat chu tun hnaiah phurh chhuah a nih avangin Zampuimanga Group YMA chuan veng turin duty dah reng tlin lo mah se, a bul hnaia awmte hnenah lo en uluk turin an chah a ni. Kuhva rah kaihhnawiha document awmte chu a lem vek a nih thu CYMA hruaitute an lo hrilh bawk.

Zampuimanga Group YMA hian February 23, 2022 khan Bairabi North-a bamboo industry kudamah Myanmar aṭanga kuhva rah tawlh ruk dah khawm nia hriat tam tham tak a awm thu an dawng a, police-te nen enfiahin an finfiah a ni.

Zampuimanga Group YMA hruaitute chuan kuhva rah awmna kudam enkawltute hnenah kuhva rahin Bairabi a thlen theihna tura document hrang hrang an neihte pe turin an ngen a; an pek theih loh avangin April 13, 2022 khan Bairabi SDC hnenah first information report (FIR) an thehlut a ni.