Police-in Kelsih dáiah rálthuam man

Mizoram police, Aizawl District Executive Force (DEF) hnuaia Kulikawn Police Station chuan nimin zing khan Kelsih dáiah ralthuam eng emaw zat an man a, inhnamhnawiha puh mi pali leh ralthuam phurhna lirthei pahnih an man bawk.

Police hotute aṭanga thu dawn danin, ralthuam an mante chu - shotgun rifle pathum, sports gun rifle pahnih, airgun VX-100 pathum, geletine tlâwn 11,000 (báwm 55) leh safety fuse báwm pali (metre 2,000 vel) a ni.

Rálthuam phurhna atana hman TATA Yodha truck MZ-01 W-1673 leh Bolero Pikup truck MZ-01 V-5978-te chu police-in an man nghal a; TATA Yodha truck hi a neitu leh khalhtu chu Lalbiaktluanga (42) s/o Lalsangliana, Mualpui Bethel, Aizawl a ni a, Bolero Pikup truck neitu leh khalhtu chu Zorem­sanga (42) s/o C Thangkima (L), Tlangnuam West, Aizawl a ni.

Police-te hian ralthuam an mante hi Assam Rifles aṭang thu an hmuh bawhzuia an man a ni a; a kaihhnawiha an man mi palite chu court-ah hruaiin, thu zawhfiah tura kawl zui an dil a ni.

Ralthuam an mante hi Aizawl aṭanga chhim lam pana kalpui lai a ni a; Myanmar tualchhung buainaa hman tur nia rin a ni.