SEDP kal dan tur Tawnluia'n a puang

Deputy chief minister leh MNF senior vice president Tawnluia chuan, an flagship programme, SEDP chu kuminah a thawh khatna an kalpui dawn a, kum 2023-ah a thawh hnihna kalpuiin, kum tin kalpui tura ruahman a nih thu a sawi.

MNF Senior Vice Presi­dent hian Inrinni khan Bawngkawna MNF zawm tharte lawm luhna inkhawm­ah thu sawiin, SEDP kalpui dan tur duante chu Governing Board-in a pawm tawh thu leh chiang zawka an la puan dawn thu a sawi a, "Kuminah hian thawh khatna kan kalpui ang a, nakkumah thawh hnihna, chutiang zelin kum tin kalpui tura ruahman a ni," a ti.

Tawnluia chuan, SEDP hmanga mipui vantlang dâwm kâng tura hmachhawp an siam mek laiin hripuiin a tibuai tih sawiin, "Kum hnih chhung invenhimna kan kalpui a, khatih chhung khan hmasawnna ruhrel lian kan thawk reng. Kuminah chuan chhungkaw lam hawiin chhungkaw 60,000 kan target a ni," a ti a; Assembly consti­tuency tinah chhung­kaw 1,500 pek tum a nih thu a sawi.

MNF Sr Vice President chuan, thusawiin, Gorkha-te chu Mizote nen unau anga awmho ṭhin an nih thu sawiin, "MNF chuan Mizorama pianga sei lian Gorkha-te tan hun rei tak anmahni ram anga an lo enkawl tawhte land pass kan pe tawh. Congress-in a tih duh miah loh kha keini chuan ram leilung faah kan pawm che u. Gorkha-te chu land settlement kan pek tawh laiin hnam dangte erawh inner line permit tel loin an lo lut thei lo," a ti.

MNF thuchhuah tarlan danin, Tawnluia hian Gorkha mi 36 MNF party-ah a lawm lut a ni.