World Malaria Day hman a ni ; Kuminah sikserh vanga thi la awm lo

Health & Family Welfare department-a National Centre for Vector Borne Disease Control chuan April 30, Inrinni khan Directorate of Health Services conference hall-ah World Malaria Day an hmang. He hunah hian kumin January leh February thlaah sikserh vei mi 354 hmuh chhuah an ni a, sikserh vanga thi an awm lo tih tarlan a ni.

World Malaria Day hmanna inkhawma tarlan danin, kumin January leh February thla chhungin Mizoramah sikserh vei mi 354 hmuh chhuah ni mah se, thi an awm lo a; Lunglei, Lawngtlai leh Mamit district-te chu sikserh hluarna (API 10 aia sang) district a ni. Kum 2021 chhung khan sikserh vei mi 5,637 hmuh chhuah an ni a, sikserh vanga thi mi 10 an awm.

Kum 2020 khan khaw­velah sikserh vei mi vbc. 241 an awm a, sikserh avangin mi 6,27,000 an thi. Sikserh vei hmuh chhuah zinga 95% leh thihpui zinga 96% chu Africa khawmualpuia mite an ni a, sikserh vanga thi zinga 85% chu naupang kum nga hnuai lam an ni.

Aizawla Malaria Day hmannaa khuallian Health minister Dr R Lalthangliana chuan, Health department programme-te chu mipui hriselna kaihhnawih vek a nih avangin an pawimawh tih a sawi a, "Covid-19 vangin kum hnih zet kan duh angin hma kan la thei lo a, tunah chuan dinhmun a ziaawm ta a, mar taka ṭan kan lâk a ngai," tiin, Mizoram chu India rama sikserh vei leh thihpui tamna state zingah a la tel thu a sawi.

Sorkarin theihtawp a chhuah rualin mipuiin tih tur an neih ve thu sawiin Health Minister chuan, "Malaria natna hluar hun, fûr kan thleng chho dawn a, malaria tamna hmun Mizoram khawthlang lama Bangladesh leh Tripura hnaih lamah uar lehzuala mipui zirtir a ngai," a ti.

Health Minister chuan, sorkar laipuiin India ram chu kum 2030-ah sikserh natna awm tawh lohna ramah siam a tum thu te, Mizoram sorkar pawhin theihtawp a chhuah thu te, sikserh tirêm turin Health department bakah department hrang hrang, chhungkua, kohhran leh páwl hrang hrang ṭanrual a pawimawh thute a sawi bawk.

Kum 2007-a World Health Organisation Assembly chuan April 25-ah World Malaria Day hman turin a rél a, kum 2008-ah hman ṭan a ni. Day hi kumin April 25 khan Mizoram district hrang hrangah hman a ni tawh a, Aizawlah chuan April 30 khan hman a ni thung. Kumina thupui chu 'Ruahmanna thar nena khawvela malaria natna avanga harsatna leh thihna tihhniam' tih a ni.