Phuaibuangah rialin in 282 a déng chhia

April 30, Inrinni tlai khan Phuaibuang khuaah nasa takin rial a tla a, in 282 chung a déng chhia.

Phuaibuang Branch YMA hruaitu Lalbiaknunga hnen aṭanga thu dawn danin, Phuaibuangah hian rial a tlak tam bakah a lian hlawm hle a, rangva in chungte chu den chhiat loh a awm meuh lo. Rialin in a den chhiat 282 zinga 82 chu hman zui tlak loh, thlak ngai a ni a, in dangte erawh chu siamṭhat theiha ngaih a ni.

Rial a tlak zawhah khawtlang hruaitu - VC te, tlawmngai pawl leh political party hruaitute'n rialin in a tihchhiat dan enfiahin an kal kual a, in chung chhiate thawm ṭhat dan tur an ngaihtuah nghal bawk.