Mizo hmeichhia pathum chawimawi

Nimin khan Agartala, Tripura-a Rabindra Satabarshiki Bhawan-ah North East Festival hman a ni a, hmarchhak state hrang hranga hmeichhia chawimawi tlakte hnenah chawimawina hlan a ni. Chawimawina hlan zingah Mizo hmeichhia pathum an tel.

North East Festival-a Mizo hmeichhia chawimawina hlante chu Women & Child Development-in an thlan chhuahte a ni a; activist R Vanrammawi, Living Roots dintu Gospel Lallawmzuali leh India hockey player Lalremsiami te an ni.

Festival hi India independence kum 75-na lawmna, Azadi Ka Amrit Mahotsav hnuaiah Development of North East Region (DoNER) leh North East Council (NEC) buatsaiha hman a ni a; thupui chu 'Role of women for development of North East' hi a ni.