Khawnvartui man nasa takin a pung Mizoram state quota a tlem tial tial

Mizoram tana khawn­vartui la luttute páwl, Mizoram SKO Dealers Association (MSDA) chuan thuchhuah siamin, tun hnaiah nasa taka khawnvartui man a san avangin sorkar laipui aṭanga Mizoramin chan (quota) a neih chu tàwp mai thei a nih thu an tarlang.

MSDA thuchhuah chuan, "Khawn­vartui (SKO) rate, central sorkarin a rawn tihto tâk vak avanga sorkar ruat retailer-te'n khawn­vartui mipuia sem tur an khul theih loh avangin, Mizoram quota phurh chhuahna lamah harsatna nasa tak kan tâwk a, March leh April 2022-a Mizoram quota pawh phurh mumal theih a ni lo. Kan harsatna tawh mek hi sutkian a nih loh chuan central sorkar aṭangin Mizoram quota pum hi tàwp thei mai dinhmunah kan ding reng a ni tih mipui kan inhriattir a ni," an ti.

Vanglaini palai zawhna chhangin MSDA president K Lalnghakliana chuan, Mizoram quota-a khawnvartui an lak luh man chu a lêt chuangin tun hnaiah a pun thu a sawi a, "Kumin January thlaah kha chuan a la pangngai viau a, February thlaah a pung hret a, March thlaah a pung leh a, April thlaah chuan nasa takin a rawn pung ta a ni," a ti.

Khawnvartui man a pun avangin dealer zinga eng emaw zat chuan March thlaa quota pawh an la kim duh tawh lo tih sawiin MSDA President chuan, "La kim duh lo kan awm tak nual avangin April thlaah khan central lamin Mizoram quota a rawn 'cut' ṭheuh tawh a, kan lak loh zel chuan khawnvartui kan mamawh loah ngaiin an cut zel a rinawm a, a rawn tihtawp hial pawh a hlauhthawnawm a ni," a ti a; state dangte pawh an buai tho thu a sawi.

MSDA President sawi danin, Mizoram sorkar hnuaiah state quota-a khawnvartui la luttu tur SKO dealer eng emaw zat an awm a, private dealer paruk/pasarih vel awmin, a bâk zawng chu MIZOFED an ni. A man a to avanga quota ang khawnvartui la lut kim thei lo zingah MIZOFED pawh an tel a ni.