ZPM kalphung tharah eirukna kan tireh dawn - Dr Vanlalthlana
Aizawl North-II bialtu MLA Dr Vanlalthlana chuan April 29, 2022 khan Aizawl North-II ZPM Block Conference-ah thu sawiin, ZPM sorkar kalphung tharah chuan corruption leh induhsakna uchuak an tihreh dawn thu a sawi.
Dr Vanlalthlana chuan, Mizoramah eirûknain bû a khuar nasat thu sawiin, "Eirûkna avangin kan ram hmasawnna hnathawh tur a ṭhuanawp nasa em em a, ZPM kan sorkar chuan eirûkna tihreh hi hna hmasaah kan nei dawn a ni,” a ti.
Hmasawnna tlo leh tluantling kalpui a ngai tih sawiin Vanlalthlana chuan, "Eirûkna avanga kan ram hmasawnna tur luang ral tawh zozai hi chhût ngam pawh a ni lo, rilru a ná a, hmasawnna ro tling tur tam tak eirûkna avangin a hlamzuih tawh a ni," a ti a; Pathian malsawm tlâka nungchang leh chêtzia, kawng tinrengah fimkhur reng turin ZPM mi leh sate a chah.
Dr Vanlalthlana chuan, ZPM MLA leh councillor-te'n an fund hmuh ang chhunte chu mi dangte tana entawn tlak ni tura ṭha taka hna thawh nan hman an tum thu a sawi a; a bial Aizawl North-II huam chhunga hmalakna hrang hrangte a sawi lang bawk.