KHAWTHLIR

Thisen pe
April 30, Inrinni khan KṬP, Kulikawn Branch chuan Civil Hospital, Aizawl tan thisen unit 56 an pe a, petute mipa 52 leh hmeichhia pali an ni. KṬP, Tuikual South Branch pawhin an din champha vawi 40-na pualin Synod Hospital tan thisen unit 33 an pe a, petute mipa 27 leh hmeichhia paruk an ni. Inrinni vêk khan ṬKP, Phawngpui West Bialin Lungtianah Siaha District Hospital tan thisen unit 30 an pe a, petute mipa 25 leh hmeichhia panga an ni a; M Kawnpui Branch YLA member mipa 22 leh hmeichhia pathumte'n Lawngtlai District Hospital tan unit 25 an pe bawk.

Fangfar tlangzarh
Aizawl North College-a assistant professor Rohmingthanga Ralte lehkhabu buatsaih, 'Fangfar' tih chu April 30, Inrinni khan Aizawl North-II bialtu MLA Dr Vanlalthlana'n Synod Conference Centre-ah a tlangzarh. MLA chuan, "Lehkhabu hi Mizote thu leh hla lama kan ṭhan belh zelna atana chona thar, thu leh hla lama min tihausatu a nih ngei ka ring," a ti.

CM-in enfiah
Chief minister Zoramthanga chuan April 30, Inrinni khan Zemabawka bus terminal siamna tura ruahman Bung Bangla a enfiah a, PWD architect-te leh khawtlang hruaitute'n an ṭawiawm. Aizawl chhim leh hmar lamah bus terminal tâwt tiziawm tura insawnna/tihlenna siam turin hmalak mek a nih thu sorkar thuchhuakin a tarlang.

IWMP project en
Khawzawl district bawrhsap CC Lalchhuangkima chuan April 29, 2022 khan kum 2009-10 aṭanga kalpui ṭan, Kawlkulh Integrated Watershed Management Programme (IWMP) project a tlawh a; ṭha taka society hruaitute'n an kalpui avangin lawmawm a tih thu a hrilh. IWMP project-ah hian sapthei chìn mek a ni a, balhla leh sum chang thei thlai dang an chíng tel nual bawk.

Campaign ngawrh
May 5, 2022-a Mara Autonomous District Council (MADC) inthlan lo awm tur atan political party hrang hrangte ngawrh takin an campaign a, MADC bial hrang hrangte political party hotute'n an ṭhutchilh mek a ni.