Ni 5 chhung hripui vanga thi an awm tawh lo

Mizoramah Covid-19 vei April 29, Zirtawpni khan mi 83 leh April 30, Inrinni khan mi 34 hmuh chhuah a ni. Inrinni leh nimin khan hripui vei dam tawh mi 120 chhuahtir an ni a, Covid-19 vei thi an awm lo a, a záwnin ni nga chhung thi an awm tawh lo.

April 29-a hripui vei hmuh chhuah mi 83-te chu mipa 32 leh hmeichhia 51 an ni a; RAT hmanga hmuh vek niin, swab sample endikna dang hmanga endik zingah positive an awm lo a, positivity rate chu 15.46% a ni. Mi 83 zingah district khawpui huam chhunga mi 15 an tel a, Aizawl khawpui bikah hmuh a ni lo. Positive hmuh tamna ber Khawlianah mi 15 hmuh a ni.

Inrinnia Covid-19 positive hmuh thar mi 34-te chu mipa 20 leh hmeichhia 14 an ni a, RAT hmanga hmuh 33 leh FIA hmanga hmuh pakhat an ni. Positivity rate chu 5.58% a ni a; sample endikna dang hmanga endik zingah hripui vei an awm lo. District khawpuiah mi 11 hmuh niin, Aizawl bikah mi paruk hmuh a ni a; mi 23 chu district khawpui páwn lama mite an ni thung.

Nimin tlai dar 5 thlenga dinhmun angin, Mizoramah a záwnin ni nga chhung hripui vei zingah thi an awm tawh lo a; thi an awm hnuhnun ber ṭum chu April 26, 2022 zing dar 9:25 kha a ni.

IDSP record angin, Mizoramah Covid-19 vei 2,27,453 hmuh chhuah a ni tawh a, mipa 1,05,915 leh hmeichhia 1,21,538 an ni a, mipa aiin hmeichhia 15,623-in an tam zawk. Nimin tlai dar 5 thleng khan mi 2,26,129 (99.42%) chhuahtir an ni tawh a, mi 696 (0.31%) thi tawhin, enkawl mek mi 628 (0.27%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,27,453 chu mi 1,000 zelah hripui vei mi 207 an awm ang a ni a; mi 1,00,000 zela Covid-19 vangin mi 63 an thi tawh ang a ni tih sorkar thuchhuakin a tarlang.