Central YMA-in dan loa Manipur-a Tuialhthei thawn tur ven zel an tum

Central YMA hruaitute chu Nilaini khan CYMA Committee Room-ah an ṭhukhawm a; Mizoram aṭanga Manipur-a dan loa tuialhthei phurh luh tur ven zel an rél a, dan loa petrol hralh leh phurtu an mante

ṭul anga hremna pek ni se, an ti.

CYMA chuan, tunlaia Mainpur boruak vanga Churachandpur-in tuialhtheia harsatna an tawh mek sutkianpui nan tank lorry valid licence nei leh CYMA remtihna neite chauh Mizoram páwn aṭanga petrol leh diesel laa tirh belh leh an remti a ni.

Dan loa Manipur-a tuialhthei phurh chhuah turte veng turin Central YMA hriat­puinain hmun hrang hrangah uluk zawka duty ni se, an ti a; duty-te thingpui inna senso tur pawh pek an rél a ni.

Mizoram chhunga filling station neitute chu black-a tuialhthei pe chhuak lo tur leh phurh chhuahtir lo turin CYMA chuan an ngen a, "Petrol pump dan loa tuialhthei pe chhuakte chu a ṭul anga hremna pek ni se, harsatna an tâwk a nih pawhin YMA-in mawh a phur lo ang," an ti.

An hriatpuinaa tuialhthei Manipur-a phur turte chuan an thu leh hla an zawm ngei CYMA chuan an phût a, ṭul bik thilah chuan Manipur Group YMA-te nen an inbiak leh tur thu an sawi.

Hetih lai hian, CYMA leh Manipur Group YMA-te'n inremna an siam hnuah, tank lorry paliin Manipur an thleng tawh a, Manipur Group YMA leh Churachandpur ADC-te'n mipui hnenah an sem a ni.