Thenzawlah Weavers Producers company din rél

CodNerc chuan nimin khan Thenzawl khuaa puantahtute pualin Thenzawl Joint YMA Hall-ah NABARD-in a duan Producers Orga­nisation chungchang an hrilhfiah a; Weavers Producers company din an rél.

He hunah hian Thenzawla puantahtute chu inhlâwm khawm a, company din a, puan man ṭha zawk leh mumal zawka kalpui theih dan tur an sawiho.

CodNerc chairman B Lalchhanzova chuan, NABARD nghenchhana puantahtute hamṭhatna tura company din a nih a, mumal taka kalpui a nih chuan NABARD aṭangin revolving fund cheng nuai 15 bakah, company enkawlna tur eng emaw chen sum an hmu thei dawn tih a sawi.

Thenzawlah hian tun dinhmunah puantah khawl 2,000 vel a awm tawh a, chhungkaw tam zawkte'n puantah hi eizawn nan an hmang mek. Chawlhkar khata Thenzawl khuain puan an hralh zat chu cheng nuai 10 vela chhût a ni.

Puan man hian tlak­hniam cháng a neih ṭhin avang leh rate ṭha zawk a awm theih nan puantahtu kalkhawmte chuan Producers company din an rél a ni.