Library ṭha thlanna atan endik hna kalpui mek a ni

Art & Culture depart­ment leh Mizoram Library Association chuan, best rural library thlanna an kalpui mek a; tunlai hian library ṭha zual an thlan chhuah tawhte endik mekin, nimin khan MJA Public Library an enfiah.

Nimina MJA Public Library enfiahnaah hian Mizoram Library Association hruaitute leh State Central Library-a hotute an kal a; library record leh lehkhabu enkawl dante an enfiah. MJA Public Library enkawltute nen an inkâwm nghal bawk.

Library endiktute sawi danin, State Library nodal department, Art & Culture department leh Library Association ten rural library ṭha ber an thlan turah hian district tinah a ṭha zual 10 ṭheuh thlang tawhin, chu'ngte chu endik an ni.

Aizawl district bikah chuan thingtlang lama library-te leh Aizawl khawpui chhunga library-te chu hlawm hranah dah a ni a; thingtlang leh district bik chu enfiah zo tawhin, tunlai hian Aizawl khawpuia library ṭha zual, top 20-te an endik mek a, an zo ṭêp tawh. Rural library tih hian pawl (NGO) enkawl library-te a huam.

State Library leh Mizoram Library Asso­ciation January 23-24, 2017-ah Aizawlah semi­nar leh training buatsaih tum a, chumi hunah chuan rural library ṭha ber an thlante result pawh puan nghal an tum a ni.