KHAWTHLIR
Car chesualah thi
January 11, 2017 zan dar 10:30 vel khan Lungleia Serkawn Indoor Satadium bulah i10 car MZ-02 A-8832 chesualin, kopang a su a, Lalrempuii (21) d/o T Lalnunthanga, Theiriat Dawrzáwl veng chu Christian Hospital, Serkawna lak a nih hnuah a hliam tuar loin a thi. Car-ah hian mi paruk an chuang a, mi dang pathumin hliam na lutuk lo an tuar nia thu dawn a ni.
Plan sawiho
Indian Constitution-a Article 275(1) behchhana, Siaha District Plan siam tur chungchanga department hrang hrangte'n ruahmanna an thehluhte chu, nimin khan Siaha DC conference room-ah DC Harleen Kumar hoin sorkar official-te'n an sawiho. Siaha District Plan siamna atan hian cheng nuai 138 ruahman a ni.
Infuih thar
Kolasib DC office-a thawkte chuan nimin khan DC conference hall-ah infuih tharna hun an hmang. Kolasib DC H Lalengmawia chuan, sorkar hnathawkte chu an hna ṭheuhte chu rawngbawlna a ni tih hria a, taima taka thawk tur leh kum liam ta aia ṭha zawk leh rah ṭha zawk chhuah tura inpekna thar nena thawk turin a fuih.
Pawisa la
Marpara YMA hruaitute hnen aṭanga thudawn danin, January 11 khan Marpara North (Chakma chenna)-ah Aadhar Card siam hna buaipuitute'n pisa hun chhungin mi pakhatah Rs. 70 leh pisa banah Rs. 200 an laksak a, Marpara Mizo Vengah pawh January 12 khan mi pakhat zelah Rs. 20 an la leh a ni.
Man zat
Champhai district-a Excise & Narcotics enforcement staff-te chuan, kum 2016 chhung khan Mizoram Liquor Prohibition & Control (MLPC) Act hnuaiah thubuai 162 an ziak lut a, mi 91 an man. Nikum
chhung vêk khan rakzu litre 2,638 an man a ni.