NGO-te nen kan thawkho tha - Zira

Home minister R Lalzirliana chuan, a záwna term hnih chhung sorkarna an siam mekah tlawmngai pawlte nen thawhhona ṭha tak an neih thu a sawi.

Mizoram Football Association-in nimina Mizo rawl-thar 17, Germany-a footbal zir turte thlahna hun IPR directorate auditorium-a an buatsaih a hmanpuinaah thu sawiin Home Minister chuan, "Kum riat pumhlûm sorkarna kan siam chhungin kan vannei a, NGO-te nen intai leh inngeih loh lutuk kan nei lo. Zirlai pawlte nen thleng pawhin kan thawkho ṭha a ni," a ti.

R Lalzirliana chuan, MLTP Act hlih a nih hnuah ṭum hnih hunpui hman zawh a ni tawh tih sawiin, "Mi tam takin zu zawrh a nih avangin khawlaia hmeichhia an lèn ngam loh leh zana páwnchhuah hlauhawm tura an ngaihna a hlawhtlin loh chhan chu sorkar mai ni lo, NGO-te thawh ṭhat vang a ni," a ti a; Krismas leh kum thar hman zawh tak chu kawng hrang hrangah a rálmuan thu a sawi.

MFA hnathawh fakin Lalzirliana chuan, "Hman lo chung chung leh beisei let nei loin ṭhalaite tan hma an la a, a rah chhuah tam tak kan hmu tawh a ni. Sorkar ang pawhin MFA chungah hian lawmthu sawi kan báin ka hria," a ti.

Home Minister chuan, Germany-a football zir turte chu ṭhangthar awm zel turte tan inzirna tur an ni tih hrilhin, "Ram leh hnam tana pên chhuak tur in ni tih hre reng ang che u. Hlawhtling tur chuan thawhrim a ngai," a ti a; ṭanpui tlaka thawkrimte chu Pathian pawhin a ṭanpui ṭhin thu a sawi.

Inkhawm hi MFA honorary secretary Lalnghinglova Hmar-in a kaihruai a; MFA president Lal Thanzara leh NEIDA (Tata Trusts) senior programme officer Dr James Lalthansanga-te pawhin thu an sawi.

U-Dream leh Tata Trusts ṭangkawp hmalaknain Germany-a kum li chhung football zir turin India hmarchhak state aṭangin naupang 35 leh coach pahnih an thlang chhuak a; Mizoram aṭangin naupang 17 leh coach pakhat an tel.

Mizoram aṭanga kal turte hian vawiinah Kolkata an pan ang a, January 16-ah Kolkata aṭangin Germany an pan dawn a ni.