Zirnaah harh tharna a thleng tur a ni - School Education Minister

School Education minister Lalchhandama Ralte chuan nimin khan a bial chhung khaw ṭhenkhat - Sunhluchhip, North Serzawl leh Darlawn khuate a tlawh.

Lalchhandama Ralte chuan vantlang inkhawm­ah thu sawiin, 'Zirnaah harh tharna a thleng tur a ni' tih chu hmar tlangdung tina a auhlâ a nih thu a sawi a, "Harh tharna a thlen theih nan sorkarin hna thawh mek a ni a, khawtlangin ṭan kan lakna tur pawimawh chu zirna hi a ni," a ti.

Minister chuan, tun hmain thingtlang aṭangin mi ropui leh chhuanawm tak tak an chhuak ṭhin tih sawiin, "Mi thiam leh ropui tak tak thingtlang aṭanga an chhuah leh theih nan zirna ngaih pawimawh a ṭul hle a ni," a ti. Hmar tlangdungah zirtirtu pakhat lek awmna te, pahnih chauh awmnate a tam tih sawiin, tun hnaiah tlangdung khaw hrang hrangah zirtirtu 87 dah thar a nih thu te, zirtirtu quarters eng emaw zat sak thar a nih thu te, Samagra Shiksha aṭangin Darlawn Higher Secondary School-ah science zirna hawn a nih dawn thute a sawi.

Lalchhandama Ralte chuan, hmar tlangdung tan Zoram kawtchhuah thar, Bagha leh Manipur kalpawhna tur kawngpui sial tura buaipui mek a nih thu a sawi a, "Hmasawnna nghet leh tlote hi hun rei lote chhunga thawh mai theih a ni lo a, hun rei tak ngai chite a ni; mipuite'n dawhthei taka kan nghah a ngai," a ti.