Covid-19 vei 203 zinga 144-te hri lakah an fihlim tawh NDRF hnaiha awmte an fihlîm rih

Zoram Medical College (ZMC) laboratory-a July 8, Nilainia mi 320-te swab sample endik zinga mi pahnihin Covid-19 hripui an vei tih hmuh a ni a, heti hian Mizorama hripui vei tawh zat chu mi 203 an ni. Hetih lai hian, Champhaia Covid-19 vei pakhat chuan a vei tawh lo tih Nilainia endiknaah finfiah a ni a, vei tawh lo hi 144 an ni. NDRF mi hripui veite'n an kai chhàwn theiha ngaih vanga endikte an fihlîm rih.

SRH-ZMC Covid-19 Bulletin tarlan danin, Nilainia ZMC laboratory-a endik mi 320 (mipa 197 leh hmeichhia 123) zinga mi pahnihin hripui an vei laiin, mi 318-te an fihlim a; Covid-19 vei hmuh tharte hi Dawngzawl, Serchhipa awm 60 Bn. BSF sipai mipa ve ve, kum 31 leh 50 mi an ni. A upa zawkin harsatna (symptom) a nei a, a naupang zawkin a nei lo. Sorkar thuchhuah chuan, BSF sipai pahnihte hi Dolcher­ra aṭanga tun hnaia rawn lêt niin, June 25, 2020-ah Vanhne base camp/quarantine centre an thleng a, July 3-ah Vanhne aṭangin Dawngzawlah an insawn a, uluk taka inkhung hrang niin a tarlang.

Nilainia ZMC labo­ratory-a swab sample endik zat chu - Aizawl district mi 186, Lunglei district mi 14, Champhai dis­trict mi 31, Serchhip district mi 53, Lawngtlai, Mamit leh Khawzawl district mi pahnih ṭheuh, Saitual leh Hnahthial district mi pali ve ve, Siaha district mi pasarih, ZMC-a awm sa mi 13 leh Assam lam mi pahnih an ni. Hetih lai hian, Champhai district-a hripui vei mek mi pahnih zinga pakhat chu July 8 khan ZMC-a a swab sample endik nawn niin, Covid-19 a vei tawh lo tih finfiah a ni a; pakhat zawk erawh chu endik nawn a la hun lo. 

Siaha district-a Covid-19 vei mek mi 14-te chu test nawn a la hun lo vek a, district danga vei mekte pawh endik nawn an la ni loa thu dawn a ni. Heti hian Mizorama Covid-19 vei hmuh chhuah tawh mi 203 zinga mi 144 (70.94%) chuan an vei tawh lo a, mi 59 (29.06%)-in an la vei mek. Vei tawh lo mi 144 zinga 143 chu chhuahtir an ni tawh a, pakhat a la chhuak lo thung. July 8, Nilainia swab sample endik zingah Lungverha awm National Disaster Respond Force (NDRF) mi, tun hnaia state páwn aṭanga rawn lutte'n Covid-19 an vei avanga an kài palh theiha ngaih mi 41-te swab a tel a, an vaiin Covid-19 an kai lo tih hmuh a ni.

Lungverha awm NDRF zinga mi, tun hnaia state páwn aṭanga rawn lut thar ni lo mi pakhatin Covid-19 a vei tih July 6, 2020 zan khan hmuh chhuah a ni a, hei vang hian Lungverh leh Sairang Dintharah total lockdown an puang nghal. NDRF mi leh sa, hripui veite'n an kài chhàwn theih tura rinhlelh - Lungverha 5th IR police leh tualchhung mi 37 leh Sairang Dinthar Venga mi palite chu July 7, 2020 khan an swab sample lak a ni a, July 8-ah endik niin, Covid-19 an vei lo vek tih hmuh a ni. Sairang Dinthar chuan an khaw mite result a negative avangin total lockdown an sût nghal a; Lungverh erawh chu Aizawl DC-in luh leh chhuah phal loh (containment area)-ah July 7 khan a puang thung. Health department-a thawkte chuan nimin khan Lungverh hi tlawhin, contact tracing buaipuiin an enfiah leh a, result negative tate pawh inkhung hrang rih turin an hriattir a ni.