Road Safety Council-ah John Rotluangliana

National Road Safety Council chu January 10, 2017 khan New Delhi-ah neih a ni a; Mizoram Transport minister John Rotluangliana'n Mizoram kawngpuia himna (road safety) atana Mizoram sorkar hmalaknate a sawi.

Transport Minister chuan, Mizoram State Road Safety Council tichak tura siamṭhat a pawimawh thu sawiin, "Dan leh hrai lamah Legislative Assembly session awm hmasa bera put luh turin bill peih a nih tawh bakah, district tinah Road Safety Committee din a ni. Committee hrang hrang khaikhawm a, thawk ṭan mai thei tur lead agency din a ni tawh a, Road Safety Fund pawh ruahman a ni," a ti.

John Rotluangliana chuan, lirthei chesual vanga thihna thleng ṭhin pawh kum 2020-ah chuan a lo berah 50% tala titlahniam tura target siam a ni tih sawiin, "Supreme Court-in a din Committee on Road Safety (CoRS) kaihhruaina pawh ṭha takin bawhzui a ni," a ti a; Aizawlah Automated Vehicle Inspection & Certification Centre din atana sum pe chhuak thuai turin thuneitute a ngen.

Meeting hi Himachal Pradesh Transport Minister-in a kaihruai a; tlang rama awm state-te tan bika rawtna dang siamin, Ministry of Road Transport and Highway-ah thehluh leh ni se, an ti.