Tlabunga Agriculture office kalpui ṭha loah ngai

MZP sub-hqrs., Tlabung chuan thuchhuah siamin, Tlabunga Agriculture department office kalpui dan te, thawktute hna thawh dante chu ngun taka an zirna aṭangin, a nih dan tur angin Tlabunga Agriculture department office chu kalpui a ni lo niin an tarlang a; vanduaithlak an tih thu an sawi.

Tlabung MZP chuan, an khuaa Agriculture department chu Sub-Divisional Agriculture Officer (SDAO) ṭhuthmun a ni tih sawiin, "Mipui chhawr theih tura thawktute dàwr theih an ni ngai lo hi pawi kan ti a, kum 2016 pawh khan office hawn mumal a ni lo a, kut hnathawktute leh mipui tana dàwr theih turin office an hawng tlem hle a ni," an ti.

Kum 2016 khan Tlabunga Agriculture department office hawn ní chu belh khawmin thla khat pawh a tling lo niin Tlabung MZP chuan an tarlang a, "Department hotu ber SDAO pawhin pisa a kái mumal lo a, Republic Day leh Independence Day bakah, NLUP sem dawn tih lohah chuan pisa a kái hmuh tur a awm mang lo," an ti a; hei vang hian Tlabung SDAO chu mipui zahlo leh thamloah puhin, kut hnathawkte tana innghahna tlâk ni tura theihtawp chhuah turin an phût tih an tarlang.

Tlabung MZP chuan, Tlabunga Agriculture department chu mipui chhawr theih tura a nih dan tur taka a awm theih nan hma la turin bialtu MLA an ngen a; sorkar thuneitute chu a ṭul anga hma la turin an ngen bawk.