Health dept. sum hman dan chhui zawh thawkhat a ni

Accounts and Treasuries hnuaia Special Audit Team chuan Health & Family Welfare department-in Covid-19 dona atana sum an hman dan an endik zo thawkhat tawh a, sum an pek chhuah hman a nih dan an chhui leh mek.

Accounts & Trea­­su­ries hotute hnen aṭanga Vanglaini thu dawn danin, Health department-in Covid-19 dona atana sum hman dan enfiahnaah hian department docu­ment hrang hrangte endik zawh a ni tawh. Health department hian anmah­ni aṭanga direct hmanraw lei lo a, a leitu turte hnena sum an pek chhuah a awm a, chu'ng sum hman dan chu an chhui zui mek a ni.

Special Audit Team-te hian an endiknaa an thil hmuh chhuahte bakah, rawtna an neihte chu sorkarah an thehlut dawn a, sorkarin ṭul a tih angin hma a la chhunzawm ang. Tarlan tawh angin, Finance department chuan Covid-19 dona atana Health & Family Welfare department sum hman dan endik turin June 8, 2020 khan Chief Controller of Accounts a hriattir a; chumi ang chuan Accounts & Treasuries hnuaia Special Audit Team-in June 18 khan endik hna an ṭan a ni.