Lìrnghîng hlaute thlamuan turin chhuak

Mizoram University (MZU) -a Department of Clinical Psychology kaihhruainain psychologist leh clinical psycho­logist eng emaw zat chu Mizoram khawchhak lama lìrnghîng vanga mipui thlabárte thlamuan turin nimin khan Aizawl aṭangin an chhuak.

Sorkar thuchhuah chuan, psychologist rual khawchhak lama kalte hi Mizoram sorkar ruahman anga kal an nih thu a tarlang. MZU Clinical Psychology department-a hotu (HoD) Prof. Zokaitluangi hoin an kal a; MZU zirtirtute leh zirlaite, MZU Alumni Psychology Association leh Mizoram Psychology Association member volunteer psychologist leh clinical psychologist mi 37 an ni.

Mi 37-te chu hlawm pasa­rihah an inṭhen a, Assembly constituency-a Champhai South leh East Tuipui bial chhunga khua zawng zawng leh Biate khuate an tlawh dawn a; lìrnghîng hlauh vanga mahni ina riak ngam lote thlamuan tur leh tih tur leh tih loh turte an hrilh dawn a ni. Volunteer-te hi Disaster Management & Rehabilitation department leh Home department-in senso a tumsak a; an tih turte an tih zawhah Champhai DC hnenah report an pe ang.