Hleih nei rorel mipuiin an kham - ZPM President

ZPM president Lalliansawta chuan, "Hleih neia rorel hi mipui­in kan kham tawh a, induhsakna rualkhai lo hi mi tinin kan ning tawh. ZPM party chuan roreltu ni ringawt lo, mipui rawngbawltu ni tel tur sorkar din kan tum a ni," a ti.

Lìrnghîngin a tihbuai Mizo­ram khawchhak lama khaw hrang hrang fanga zin kual ZPM President hian nimin zing khan Khuangthing khuaa ZPM hruaitute lo kâwmtute hmaah thu a sawi a; "Sorkar kan hrawn tawhte rêng rêngin mipui rawngbawltu tur an nih inhre loin, mipui mitmei veng miah loin, remchang lo chung pawhin party mite uchuak takin an duhsak ṭhin," tiin, sorkarna chang tawhte thil tih dan chu mipuite'n an kham tawh thu a sawi.

Lalliansawta chuan, inthlan lai chuan chak zawk nih tuma inep ṭhin a nih thu sawiin, "Mahse, thlan tlin apiangte chu mipui ta an ni a, rualkhai taka mipui rawngbawl tur an ni. ZPM chuan hleih nei rorelna sorkar kal­phung hi thlak danglam a, rualkhai taka mipui rawngbawltu sorkar din kan tum a ni," a ti. ZPM President chuan, East Tuipui huam chhunga lìrnghîng reh thei lo vanga mipui thlabàrnain state sorkar a au ei zo loa a hriat thu sawiin, "District thuneitute chuan hmun hima mipui riahbûk daih silpauline an pe sêng lo," a ti a; lirnghingin a sãwi nat zual khaw mite tan hmun him ruahmansak dan thlenga ngaihtuah a hun tawh thu a sawi. ZPM President leh hruaitu dangte hian nimin khan Farkawn leh Khuang­leng inkar khaw hrang hrang an tlawh a, khaw tinah silpauline leh thilpek dang eng emaw zat an pe a ni.