MADC-a MDC inthlan neih turah Campaign-in a vàwrtàwp a thleng

May 5, 2022 (Ningani)-a Mara Auto­nomous District Council (MADC)-a member of district council (MDC) inthlanpui neih turah campaign-in a vàwrtàwp a thleng mek a, political party hrang hrangte'n theihtawp an chhuah mek zel. Campaign hun hi vawiin tlai dar 5 hian a tàwp ang.

MADC inthlanpuia campaign-ah hian political party hrang hrangte chu Aizawla an hruaitu lian tak takte hoin Siaha district chhunga khaw hrang hrangah an campaign a; BJP chu sorkar laipuia minister leh MP-te hoin an campaign a ni. MNF leh ZPM party-te chuan nimin khan Siaha Press Club-ah thuthar thehdarhtute an kâwm.

MNF adviser Lalruatkima chuan nimin khan Siaha Press Club-ah thuthar theh­darhtute kâwmin, LADC leh CADC mipuite’n Mizorama sorkar lai party ngei thlan ṭhatna leh hlâwkna an hria tih sawiin, Mara Autonomous District Council (MADC) mipui pawhin state-a sorkar lai ngei an thlan tlin an beisei tlat thu a sawi.

Lalruatkima hian, Mara district hma­sawnna turin MNF sorkar, Zoramthanga kaihhruaiin nasa taka hma a lak tawh thu a sawi a, "MADC-a hmasawnna nasa lehzual a thlen theih nan mipuite’n MNF party sorkar an din ngei kan duh. State sorkar nena zài khata luang za a, engkim tiho thei tur state-a sorkar lai MNF ngei hi MADC mipuite'n thlang tling turin thinlung takin kan ngen a ni," a ti.

ZPM MADC Election Committee chairman TBC Lalvenchhunga chuan, ZPM party-in a ṭum khatna atana MADC inthlanpui an hmachhawn thei chu an lawm thu sawiin, ZPM candidate-te leh ZPM thlàwp independent candidate-te vote turin Siaha district mipui a ngen.

TBC Lalvenchhunga hian nimin khan Siaha Press Club-ah thuthar thehdarhtute kâwmin, "Rorelna ṭha din turin ZPM can­didate-te leh independent candidate kan thlàwpte lo vote turin MADC mipui kan ngen a, campaign hun chhunga min ṭawiawmna leh duhsakna avangin mipui hnenah lawmthu kan sawi a ni," a ti.

TBC Lalvenchhunga sawi danin, May 5, 2022-a MADC inthlan turah ZPM-in candidate pariat an nei a, chungte bakah chuan, ZPM manifesto leh kalphung ṭha titu independent candidate pahnih - Tisi biala David Johnson leh Laty biala Dr Robinson Khithie te chu ZPM party-in an thláwp a ni.

MNF adviser Lalruatkima chuan, May 5, 2022-ah MADC inthlan a ni dawn tih sawiin "Theih tâwka kan zir chiannaah MNF sorkar thar a piang ngei dawnin a lang a, a lawmawm kan ti tak zet," a ti a; inthlan atana political party hrang hrangte'n theihtawpa an inbuatsaihnaah mawi lo lutuka thâ thawh an awm lo nia a lan thu leh inthlanna buatsaihtu State Election Commission hmalakna lawmawm an tih thu a sawi.

MNF Adviser chuan, SEDP hmangin Zoram tan hna nasa takin thawh a ni tawh nia sawiin, "Kawng siam nan te, kawng chhia thawm ṭhat nante leh infrastructure development atan nasa tak hman a ni tawh. Manpower development atan hman ni bawkin, zirtirtu sang chuang SEDP hmangin lak a ni," a ti.

SEDP chu hriselna lam atan te, mipui vantlang himna atan te, de-addiction leh rehabilitation centre siam nan te, SEDP pilot project atan chhungkaw 2,000-te Sericuture leh AH&Vety hnuaiah kalpui a nih tawh thu te, Horticulture leh Agriculture-ah pilot project atan kalpui a ni tawh thu te, mamawhtute in chhung khur thleng phak tura buatsaih mek a nih thute a sawi bawk. Lalruatkima hian MNF sorkarin Siaha district-a hna a thawh tawhte a tarlang bawk a ni.

ZPM MADC Election Committee chairman TBC Lalvenchhunga sawi danin, May 5, 2022-a MADC inthlan turah ZPM-in candidate pariat an nei a, chungte bakah chuan, ZPM manifesto leh kalphung ṭha titu independent candidate pahnih - Tisi biala David Johnson leh Laty biala Dr Robinson Khithie te chu ZPM party-in an thláwp a ni.

MADC inthlan puan aṭangin ZPM-in theihtawp an chhuah tih sawiin Lalvenchhunga chuan, "MADC mipuite'n politics hlui leh insawichhiatnate an kalsan mek tih kan hmuh hian meichher chhitu an ni tih kan hmu. Hmun ṭhenkhatah party dang candidate-te nen inpawh taka chawhlui kîlhona hun kan nei theite hi kalphung thar niin kan hria. Inelrèlna leh inîtsîkna, dâwt leh thu dik lo hmanga inbei mai lo a, lungrual taka theihtawp an chhuah hmel kan hmuh hian a lawmawm kan ti tak zet a ni," a ti.

TBC Lalvenchhunga chuan, sum leh pai hmachhuan tur an nei lo tih sawiin, "Kan theih tâwka ṭha leh remhriatna thawh khawma thawhhona ṭha tak hnuaia MADC inthlan vawi 12-na mah ni se, ZPM tan ṭum khatna kan hmachhawn thei hi kan lawm hle," a ti a; inthlan campaign hma aṭangin hmun hrang hrangah ZPM hruaitute party inthliarna awm loa VC-te'n an lo dawngsawng ṭhin chu lawmawm an tih thu a sawi bawk.