Induhsakna tel loa zirtirtu la turin NSUI-in Minister ngen

National Students Union of India (NSUI), Mizoram chuan nimin khan School Education minister Lalchhandama Ralte hnenah lehkha thehlutin, zirtirtu lâk a nih leh dawn chuan criteria mumal leh zirtirtu nih tling leh party induhsakna tel loa la tawh turin an ngen.

NSUI, Mizoram chuan, SEDP-hnuaia zirtirtu lak danah felhlel leh political party hamṭhatna laa zirtirtute tehna (criteria) mumal awm loa lak a ni fo chu an ngaimawh thu leh pawi an tih thu an tarlang a; chutih rualin, zirtirtu indaih lohna phuhru tura SEDP hnuaia zirtirtu eng emaw zat lak a ni chu lawmawm an tih thu an sawi.

NSUI chuan, zirlaite school unifom inang vek tura hmalakna kal mekah, zirlai nu leh pate'n uniform an lei vek tawh avangin academic session 2022-23 ah chuan kalpui rih lo a, 2023-24 aṭanga kalpui ṭan zawk tur leh, zirlai nu leh pate harsatna siam lo zawnga hma la turin Education Minister an ngen bawk.