Mizoramah mau chi hrang 30 a awm

Azadi Ka Amrit Mahotsav North East Festival pualin nimin khan Aijal Club-ah Horticulture department-in Program for Round Table on Bamboo an buatsaih a, Horticulture Development Board vice chairman Prof. F Lalnunmawia, MLA-in a hmanpui. He hunah hian, Mizoramah mau chi 30 a awm thu tarlan a ni.

Prof. F Lalnunmawia chuan, kum hnih kal ta chhungin Horticulture department-in pilot project atan Dendrobium Brandisii leh D. Sikkimensis plantation-ah nasa takin ṭan a la tih a sawi a, "Bamboo Link Road project pawh sorkar laipuiin a pawm tawh. India rama bamboo resource 28% hi NE-ah awmin, bamboo forest hian total forest area aṭanga chhûtin 12.8%-a zau a awh a, hmarchhak state zingah Mizoramin bamboo diversity a nei sang ber a, mai chi 30 lai kan ramah a awm a ni," a ti.

Mizoram chu bamboo diversity-ah sang hle mah se, mau tihhmasawnna atan technology, industrial infrastructure leh thil dangahte ṭan lak a ngai tih sawiin F Lalnunmawia chuan, Mizorama awm Melocanna baccifera-in mipui mamawh a phuhrûk zawh loh avangin sorkarin bamboo chi dangah ṭan a lak thu a sawi.

Round table-ah hian additional chief secretary JC Ramthanga, Horticulture director Dr Elizabeth Saipari, Dr Carmelita Lalchhanhimi Pachuau, CSIR-AMPRI director Dr Avanish Kumar Srivastava, Horticulture joint director L Lalhmingmawia Pachuau bakah, video conference kaltlangin New Delhi, Tamil Nadu leh bamboo sector hrang hranga thawkte an tel a ni.