May 5-ah President a lo zin dawn

President Ram Nath Kovind chuan zan khat riak turin May 5, 2022 khian Mizoram a rawn tlawh dawn a, Mizoram University convocation a hmanpui ang a, a tuk May 6-ah Mizoram a chhuahsan ang.

President lo zin tur chungchangah hian Traffic SP Rodingliana Chawngthu chuan Aizawl khawpuia lirthei tlàn dan turah hriattirna a tichhuak. President chêtvelna tibahlah thei thil kawngpui dungah a awm a thiang lo a, hriat loh vanga buaina tawh a nih loh nan leh, ṭul loa hun sèn thlawn a nih loh nan lirthei khalhtute inhmakhua a, pumpelh dan kawng zawng turin a chah. 

Tluang taka President a vei vah theih nan lirtheite pawh ni dang aia rei an din a ngaih dawn thu a tarlang bawk.

TRAFFIC SP THUCHHUAK
1) Ṭhuampui Helipad aṭanga Raj Bhavan inkar, Ṭhuampui - Bawngkawn - Chaltlang - Chanmari - Zarkawt - Dawrpui - Venghlui inkar kawngpuiah May 5 zing dar 7 aṭanga chhun dar 12:30 inkarah kawngpui dungah lirthei leh bungrua dah phal a ni lo.
2) Raj Bhavan aṭanga Mizoram University inkar, Tuikual - Dinthar - Dawrpui Vengthar - Vaivakawn - Luangmual - Chawlhhmun - Sakawrtuichhun - Tanhril inkar kawng dungah May 5 chawhma dar 10 leh tlai dar 6 inkarah lirthei leh bungrua dah phal a ni lo.
3) May 6 zing dar 7 leh chawhma dar 10:30 inkarah Raj Bhavan aṭanga Ṭhuampui Helipad inkar kawngpui dungah President chêtvelna tibahlah theia lirthei leh bungrua dah phal a ni lo.