Covid-19 donaa chesuala thite cheng nuai 50 pe dawn

Task Group on Insurance for Frontline Workers Fighting COVID-19 chuan Covid-19 donaa thawkte puala Pradhan Mantri Kalyan Yojana (PMGKY) hnuaia insurance package a siamah Mizorama Covid-19 kaihhnawiha duty, an duty-naa chêtsualna vanga thi mi pahnih ràlna tur chu Ministry of Health & Family Welfare-in a pawm a, mi pahnih hnenah cheng nuai 50 ve ve pek a ni dawn.

Insurance package hian private healthcare institution-a thawk Covid-19 donaa tel te, Covid-19 damlo enkawltu te, health lam hnathawkte leh Covid-19 dona hna hrang hrang thawktute zinga chetsualna vanga thite a huam a; Mizorama Covid-19 Task Group on Insurance chuan Covid-19 kaihhnawiha an duty-naa chesual leh thi mi pahnih tan PMGKY-ah ràlna tur a dilsak a ni.

Covid-19 Task Group on Insurance chairman Ramchuana, Finance (EA) additional secretary chuan, insurance package-a dilna an thlen chu a tirah sorkar laipuiin a hnâwl tih a sawi a, "Kum 2020 khan chetsualnaa thi mi pahnih tan sorkar laipuiah dilna kan thlen a, an criteria siam zingah an tel lo nia sawiin an hnâwl. Theihtawp chhuahin sorkar laipuiah kan nawr a, keimah pawhin ziakin ka thlen," a ti.

Ramchuana chuan, tun hnai khan sorkar laipuiin mi pahnih hnena insurance package pekna tur an pawm thu an rawn hrilh leh tih sawiin, "Kum 2021 khan kan dilna hnâwl a nih thu min rawn hriattir a, an pawm leh kan beisei tawh lo. Tun hnai khan package aṭanga pawisa pekna tur dilna chu pawm leh a nih thu leh, bank account leh Aadhaar card-te min rawn dil leh a ni," a ti a; Covid-19 kaihhnawih duty-naa chêtsualna vanga thite chhungte'n pawisa an dawng tur chu an lawmpui thu a sawi.

LTF/VTF Covid-19 Ex-Gratia Lumpsum Compensation Scheme hnuaia March 31, 2022 hma lama dilna lutte nimin khan an ngaihtuah thu sawiin Ramchuana chuan, "Dilna pakhat chu clarification tih turin kan thawn lêt a, a hmaa clarify tura kan thawn tawh sa pahnih nen a vaiin clarify tur pathum kan thawn lêt tawh," a ti a; Task Group on Insurance-in dilna 10 vel an dawn tawh thu leh paruk an pawm thu a sawi bawk.