April 2022-ah hripui vei mi 2,931; Chhuahtir mi 3,197; thihpui mi 11

Kumin April thla chhung khan Mizoramah Covid-19 vei mi 2,931 hmuh chhuah a ni a, March 2022-a hmuh chhuah 9,869 aiin 6,938-in a tlem zawk. Hripui vei dam tawh mi 3,197 chhuahtir an ni a, hripui vangin mi 11 an thi.

IDSP, Mizoram chhinchhiah danin, April 2022 chhunga Covid-19 positive hmuh chhuah mi 2,931 chu chawhrualin ni tin mi 97.7 an awm ang a ni a, positivity rate chawhrual chu 12.74% a ni.

Thla hmasate aiin positive hmuh zat leh positivity rate tlahniam viau tawh mah se, WHO-in Covid-19 leng thununna hmuna a ngaih chin 5% let aia tam a la ni. Positivity rate hi kuminah chuan January-ah 19.75%, February-ah 25.16% leh March-ah 15.27% a ni.

April 2022 chhungin swab sample 23,010 endik a ni a, March thlaa endik zat 64,611 zatve a tling lo. April thlaa Covid positive hmuh tam ber ní, ni 4-ah mi 175 hmuh chhuah a ni a; April thlaa ni 30 zingah ni khatah mi 100 aia tam hmuh chhuah ṭum ni 14 a awm. Positive hmuh tlem ber ní, ni 3 leh ni 30-ah mi 34 ve ve hmuh a ni.

Hripui vei dam tawh April thlaa chhuahtir zat chu mi 3,197 an ni a, positive hmuh zat aiin 266-in a tam zawk. Chhuahtir an tam ber ní, April 4-ah mi 202 chhuahtir an ni a, chhuak an tlem ber ní April 17-ah mi 26 chhuahtir an ni.

April 2022 chhung vekin Covid-19 vei zinga mi 11 an thi a, March thlaa thi zat mi 28 aiin 17-in an tlem zawk. April thlaa ni 30-ah thi awm loh ní ni 19 a awm a, ni 11-ah thi awmin, thi an awm ní-ah pawh ni khatah mi pakhat zel an thi a ni.